Уул уурхайн дэд сайдын марафон

2016.11.23 Лхагва №107 (2138)

Засгийн эрх авсан МАН-ын албан тушаалын томилгоо дуусах болоогүй бололтой. Нэг албан тушаал эзэнтэй болохтой зэрэгцэн нөгөө суудал хоосорч байгаа аж. Тухайлбал, хэдэн сарын өмнө л сонгон шалгаруулалт явуулж бүлэг дээрээ хагалж байсан Уул уурхай, хүнд үйлдвэрийн дэд сайдын суудлын төлөөх өрсөлдөөн дахиад тэгээс эхэлж байна. 

Нэг ёсондоо “Эрдэнэт” үйлдвэрийн гүйцэтгэх захирлын марафон дуусч Уул уурхайн дэд сайдын суудалд хэн тухлах вэ гэх яриа энэ долоо хоногийн халуун сэдэв болох нь. Учир нь, удтал яригдсан уулын баяжуулах “Эрдэнэт” үйлдвэрийн захиралд Уул уурхайн дэд сайд Х.Бадамсүрэнг томилохоор болсон байна. Тэрээр уул уурхайн салбарт инженерээс эхлээд захирал хүртэл алба хашсан туршлагатай нэгэн. 
Нэгэнт Х.Бадамсүрэн шинэ албан тушаалд томилогдож буй учир түүний оронд хэн дэд сайд болох вэ гэх асуудал МАН-ын удирдлагуудын түвшинд яригджээ. Одоогоор Удирдах зөвлөл дээр албан ёсоор яригдаагүй ч албан бус тохироонууд аль хэдийнэ өрнөж эхэлсэн байна. Энэ суудалд гурван хүний нэр яригдаж буй бөгөөд Эрдэс баялаг эрчим хүчний сайд асан Д.Зоригт, УИХ-ын гишүүн асан Д.Загджав, Хүнс, хөдөө аж ахуйн сайд асан Т.Бадамжунай нарын нэр дуулдлаа.  
Тэднээс хамгийн өндөр магадлалтай хүн нь Д.Зоригт аж. Эх сурвалжийн өгсөн мэдээллээр түүнийг Засгийн газраас дэмжсэн байна. Д.Зоригт нь 1988-1994 онд Москвагийн Олон улсын харилцааны дээд сургуулийг улс төр судлаач, хятад судлаач мэргэжлээр дүүргэж, 1996-1998 онд Австралийн их сургуульд олон улсын харилцааны магистр, 2002-2003 онд Японы Киюшюгийн их сургуульд Хууль зүйн ухааны магистрт суралцсан нэгэн аж. 
Тэрээр Гадаад хэргийн яам, Сангийн яам, Үйлдвэр, худалдааны яаманд ажиллаж байсан бөгөөд “Эрдэнэс MGL” компанийн гүйцэтгэх захирлаар ажиллаж байжээ. Мөн Эрдэс баялаг эрчим хүчний сайдын алба хашиж байхдаа Ашигт малтмалын тухай хуулийн төсөл болон Тавантолгой, Оюунтолгойн гэрээг байгуулах ажлын хэсэгт нарийн бичгийн даргаар ажиллаж байсан билээ. 
Д.Зоригт МАХН-д /МАН/ 2004 онд элсч, АСЗХ-ны Удирдах зөвлөлийн гишүүн, Бага хурлын гишүүнээр сонгогдож байсан бөгөөд нам доторх фракцуудын дотор Сү.Батболдын хүрээлэлд багтдаг аж. 


Манай сайт таалагдаж байвал Like дараарай, баярлалаа.